entschuldigung

wir entschuldigen uns hiermit für den schweizerdeutsch geschriebenen blog... es gab doch einige rückmeldungen darauf, dass schweizerdeutsch schlecht lesbar ist, und dann erst noch mit den komischen umlauten...

doha- 2. und 3. tag (es nimmt langsam es end...)

leider wimmlets nöd vo wueschte-agebot in doha, mae chan nöd chum zum flughafe us und isch scho umzinglet... falsch... mir haend mit mueh und not ein abueter gfunde, denn per zuefall no en zweite und irgendwaenn- nachdem mer alles scho verlore gaeh haend, haet euses hotel no en dritte fueregholt. mit dem simmer letschtendlich geschter uf en usfahrt in wueschtesand. ui!

euse driver- dae hamed (oder so aehnlich)- isch eus go abhole und mir sind oeppe e stund us doha usegfahre.

uf em parkplatz usserhalb vo doha hämmer denn no paar kamel troffe...

schad ghört mä nöd, wie das kamel petra amotzt- ich glaub, die händ nöd so gern streicheleinheite...

denn haet dä hamed luft us de pneu glah und mir sind ab in sand. laeck isch mir schlecht worde- das fuehlt sich a wie seechrank... das geholper und uf und ab und bremse und gas gaeh... isch ja scho cool gsi, am afang no, wos mer nonig schlecht gsi isch, aber nacher... de hamed haets recht im griff gha, mir sind maengmal recht steil duruuf und durab und au so chli siitwaerts (da isch mer daenn amix s herz fasch d hose abgrutscht).

diversi stopps händ eus d möglichkeit gäh, föteli z mache...

am hamed sin kolleg hät unbedingt no es föeteli mit eus welle- machemer doch gern ;-)

er seg jede tag idä wüeschti, aber er machi etz s erscht mal föteli- wers glaubt ;-)

aso mir haends etz uf jede fall gseh. vilicht waers wuerklich no e cooli erfahrig gsi, e nacht imene beduinecamp z verbringe, aber es isch eus eifach noed 1600 ryal wert gsi (rund 500 stutz, will mer ja 4 luet hetted muesse zahle...) ja, aso simmer geschter 4 stund chli dusse gsi und huet haemmer moeglichscht lang im hotel fernseh gluegt (susch chamae leider in doha echt noed so vill astelle) denn simmer an flughafe go ichecke und etz simmer sit oeppe 3 stund widaer im city centre, em shopping centre, wo nonig wuerklich im city centre isch (wird bald, schliesslich stoend rundume oeppe 100 wolkechratzer, wo idae nachschte jahre fertigbaut werded). etz haltemer no paar stund dure, bis mer am 1.45 euse flug haend (11.45 schwiizer ziit...)

mir haend vo qatar au no paar fazit ergaenzt, aso luegeds eu a ;-)

doha- 1. ganze tag

huet haemmer bis am 9i pennt (nachdem mer relativ frueh is bett sind, wills da noed wuerklich oeppis zum undernaeh gaeh haet und will mer ja doch scho 4 stund laenger uf de bei gsi sind- sind etz nur no 2 stund zu de schwiiz verschobe statt wie in bangkok 6...) und denn fett zmorge gaesse. schliesslich muemers ja usnuetze, dass s hotel da so tuer isch ;-)

denn simmer namal is zimmer und haend gwartet uf de bscheid vo de alpha tours frau. die haet eus naemlich am aabig vorher versproche, sie lueti a, wenn oepper e tour well bueche. s problem mit dene toure isch ja, dass bi de meischte 3 bis 4 luet minimum muend bueche (oder zahle) dasses ueberhaupt duregfuehrt wird. bis etz haet sie no kei buechige fuer die naechschte taeg und- man staune- es isch hochsaison!

uf jede fall haet sie gseit, sie gaebi eus bis oeppe am 12i bscheid, bis daenn wuessi sie, ob oepper oeppis buechi. ok... am 10i haemmer no kei nachricht gha. am halbi 2- womer sind go saege, mir welled no e nacht laenger im hotel bliibe, haemmer immer no keini gha. bim zmorge haemmer no die glegeheit packt und de brasilianer, womer am aabig vorher im hotel troffe haend, gfraeget, ob er evt. e tour wuerd mache- denn muesstemer fuer die overnight desert tour *nur* no ei person zuesaetzlich zahle. er ueberleit sichs.

nachdem mer 2 oder 3 film glueget haend, simmer gaeg di 4i usem hotel. zwuesched 12 und 4 lauft ja eh nuet da- allgemeini siesta-ziit...

mir sind es paar km gloffe und zwar am meer entlang vo eusem hotel zum shopping centre, wo mer geschter scho gsi sind.

strandpromenade (hafepromenade)

parks häts in doha au... eifach grad nebed de strass...

etz goemmer denn widaer hei, wills ja absolut nuet z gseh git in doha... geschter simmer no a dae souqs gsi, aber das isch nach de maert vo bangkok noed wuerklich oeppis speziells gsi.

etz hoffemer, dass mer morn irgend e tour choend mache. entweder mit em brasilianer, oder aber mit eme serb und sine kollege, wo da schaffed. ihn haemmer am meer entlang im alte fischerhafe troffe und aghaue. mal luege, ob er paar luet zaemebringt. und ebefalls mal luege, ob morn bi alpha tours ueberhaupt oepper ume isch... am friitig isch da naemlich allgemein sunntig und niemer schafft- anschiinend. suscht haends da 6-tage-wuche...

bangkok-doha

nachdem mer widaer mal am morge frueh ufgstande sind (halbi 5i das mal) haets widaer gheisse reise, reise, reise... euse flug vo bangkok nach doha waer am 7.50 gfloge, wills aber alli so easy gnoh haend haemmer gfuehlti 60 min verspaetig gha... petra findets no erwaehnenswert, wie super die security control gschafft haet in bangkok. sie haend sehr gnau eusi taesche ufem screen agluegt (gnauer gseit mini...) und haend denn nacher welle, dass petra ihri taesche ufmacht und ihne zeigt, was sie drin haet. ok, mir muend zuegaeh, eusi taeschene haend es aehnlichs format...

uf jede fall isch bi ihre ja nuet verdaechtigs drin gsi, aso simmer zum gate abe. doet une han ich es chlises duerschtli gha und nichtsahnend und unschuldig mini 1.25l-sprite-flaesche fueregnoh. petra haet ihres muul nuem zuebracht- und scho haets au bi mir klick gmacht (endlich!) klar, mae daerf doch eigentlich kei fluessigkeite mitnaeh (scho gar noed en 1.25l-flaesche, wo no oeppe en drittel voll gsi isch...) janu, ich han min schluck gha und bin froh, dass mi noed gschnappt haend ;-)

ca. um die ziit, womer in doha hetted muesse sii, simmer denn doch au acho. als erschts simmer idae departure go fraege, ob mir euses gepaeck (de gross rucksack) choented neumetz deponiere. nei, natuerlich noed- sicherheitsrisiko, v.a. bi eus sprite-flaesche-schmuggler noed z verachte ;-) aso haemmer die halt mitgnoh. vorher haemmer no geld gwechslet idae qatar national bank am flughafe. de typ haet ueberhaupt keis flair fuer zahle gha (und das saeg ich, aber ich chan no 101 dollar i 20er, 16 5-dollar-note und en eindollar zaemezelle, oder? usserddem haet er mir zwei biigeli muesse mache mit de ryal, d.h. 366 ryal dur 2- mega schwierig, oder? immerhin, ich schaff noed uf de bank und choennt das no! d schwiizer franke, woni no tuuscht han, hani bim andere agstellte muesse hole, will de erscht de login noed gha haet fuer zum schwiizer franke wechsle... hae? nach ueber 45 min (petra haet uf d uhr gluegt, will sie eleige dusse gwartet haet) haemmer euses geld gha. sie haet gmeint, ich chaem nueme...

denn haemmer es taxi gnoh zum youthhostel al lakta. de taxifahrer haet zersch no en andere muesse fraege, wo das isch- kein guete start... er haet eus denn an arsch vo de welt bracht- middle of nowhere, wie petra gmeint haet- ich wuenschti, es waer middle gsi... nachdem mer e halb stund doet gsi sind und de receptionischt sini witzli gschisse haet, mir usserddem die einzige fraue under oeppe 30 manne bi de teezeremonie gsi sind, haemmer eus denn sicherheitshalber us em staub gmacht. mir sind eus chli verarscht vorcho. im internet isch gstande, es zimmer 15 dollar, er haet eus gseit, pro person 27 plus haet er eus keis taxi welle ruefe, will die noed schaffed vom 1 bis am 5i- ageblich... janu, simmer halt gloffe, will sin kolleg, woner telefoniert haet, au noed vor em 4i haet welle cho... oeppe e viertelstund weg simmer inen burgerlade go frage, ob die eus es taxi choened ruefe. haends probiert- waehrenddem haemmer gratis pommes und z trinke uebercho- aber haet niemer abgnoh. irgendwaenn isch en agstellte uf d strass und haet eus en fahrer aghalte, wo grad fiiraabig gha haet. dae haet vilicht freud gha!

er haet eus is city centre bracht. aber das isch es iichaufszentrum gsi... doet haemmer infos gholt vo anderne touris und sind etz im internet es hotel go bueche. etz goemmer zu dem hotel und hoffed, dass mer vo doet us endlich en wueschtetrip choend bueche. uf jede fall isch doha eiduetig s tuerschte pflaschter- aber das haemmer ja scho vorher gwuesst... ei nacht... nei, mir saeged gar noed wie tuer (scho no chli meh als s youthhostel, aber ebe...)!

so, etz goemmer, de timer lauft ab... bis bald dihei, wahrschindlich bim naechschte iitrag...

siem reap-bangkok

nach ueber 10 stund busfahrt simmer in bangkok acho, aber alles vo vorne...

am 8i am morge simmer puenktlich vo siem reap abgfahre. mir haend scho freud gha, dass mer so puenktlich sind. aber die freud isch denn gli chli gwiche, wo mer euse bus gseh haend.

en 20-plaetzer, uralt, duregsessni polschter und kei platz fuer d bei. und denn, nachere halb stund fahrt isches no schlimmer worde. die strasse sind wuerklich so, wies im reisefuehrer staht- beschisse! es sind ebe gar kei strasse sondern drecksweg, mega staubig und schlagloecher noch und noecher! en tipp fuer fraue: wenn ihr die strecki mal fahred, packed euen sport-bh ii. schmerz!

nach em 3 (aso nach ueber 7 stund) simmer denn a dae grenze in kambodscha acho. doet e halb stund astah zum usreise, denn 500 m laufe zu de thais uebere go en stempel hole und denn luege, wo euse naechscht bus fahrt- mir haend natuerlich kaen kambodschanische fahrer gha, wo eus irgendoeppis gseit oder zeigt haet... irgendeine haet eus denn aghaue und eus es ticket fuer de naechscht bus gaeh und gseit, dae fahri am 5i. ok, haemmer no eis trunke bis daenn und haend eus scho uf s schlimmschte gfasst gmacht. am 5i fahrt en lila bus vor, so en richtige car mit aircon und allem und schoene vorhaengli (lila). und das isch tatsaechlich euse gsi! jipee! und die strasse in thailand- eifach sagehaft! mir sind innerhalb vo chli meh als 4 stund in bangkok gsi und irgendanere chruezig useglah worde. vo doet simmer denn is backpackers viertel (will das grad am naechschte gsi isch- nei, hulmi mir sind doch noed a *dini* strass sukhumvit) und haend doet es guesthouse gsuecht. paar zimmer agluegt und denn haemmer irgendwaenn geduld verlore und haend etz es zimmer mit shared bathroom fuer 300 baht gnoh. (das sind 9 franke, also 4.50 pro person und nacht- voll ok...)

will mer so dure gsi sind, simmer nur no under duschi und go penne.

am maentig simmer denn zersch mal is chinatown go luege, ob mer de market finded. isch chli es underfange gsi und mir haend denn irgendwaenn es tuc tuc gnoh. dae haet eus eimal im chreis umegfuehrt und denn fasch widaer am gliche ort abgsetzt, aso wenn mer no 100 m wiiter gloffe waered, hettemers selber gfunde gha... janu, widaer oeppis glernt...

nachdem mer doet dur de maert dure gsi sind, haemmer es schiff gnoh is quartier ko ratanakosin.



leider simmer ersch am halbi 3 oeppe doet gsi, darum isch de emerald buddha scho nueme zum aluege gsi und darum haemmer au gfunde, mir zahled etz die 350 baht noed fuer de iitritt in grand palace, wenn mer scho de buddha noed choend aluege...

aso haemmer eifach eusi roeckli montiert, womer haend muesse und sind mal richtig iigang gloffe. doet haemmer foeteli gmacht und sind widaer zrugg.

hauptsach mir haend eus sonen rock usglehnt gha, will mae noed mit 3/4-hose ine hett daerfe...

vom palace us haemmer denn es tuc tuc gnoh in lumpini park. wow, isch das schoen gsi doet. halt en riesige park mit wiese und baeum und wegli und ganz vill jogger und walker underwaex. mir sind eigentlich doet ane, go d afternoon aerobics classes go aluege, wie das im reisefuehrer staht. seg great entertainment, egal ob mae mitmacht oder noed. aber zersch simmer go takraw luege, will mer das grad so gseh haend. takraw isch eigentlich fuessball ufeme feld chli chliner als em volleyfeld und mit de gliche regle (fasch) wie volley. eifach ohni haend, nur mit fuess und chopf. hammermaessig! es haet eus so fasziniert, dass mer oeppe e stund doet ghockt sind und zuegluegt haend...




denn simmer aber gange uf d suechi nach em aerobics.

petra hät doch no es paar vo de vita-parcours-grät müesse usprobiere...

eimal rund um de park gloffe und denn haemmers denn gfunde, doet womer am afang iecho sind. sind scho paar parat gsi und mir haend eus denn au parat gmacht. petra zum mitmache und ich zum filme und foetele. das isch wuerklich e show!


oeppe 300-400 luet mached alli mitenand aerobics! das muess mae eifach gseh ha! petra haets leider noed so im griff gha, darum haet sie denn nach paar minute ufghoert. irgendwaenn simmer denn richtig nightmarket patpong gloffe- dae haet eus de tuc tuc fahrer uf em hiiweg zeigt gha. natuerlich haend eus doet irgendwelchi jungs welle i so go go clubs locke mit irgendwelchne luschtige zetteli, aber mir haend eus noed verfuehre lah ;-)

mir sind am market nah und haend gross gshoppet. aber jeans haend sich noed uf weniger als 600 baht abemaerte lah- kei chance! zwei englaenderinne (gaeg di 50i zue) haend eus denn en tipp gaeh vo wage wievill dass mer soelled zahle fuer es t-shirt und haend eus vom underground market bim world trade centre verzellt. doet goemmer etz huet ane. seg anschiinend recht agnehm und guenschtiger als uf em patpong.

bevor mer de underground market gfunde händ, häts no en erfrischig für petra gäh...

nach patpong simmer i euses quartier zrugg go euses zueg ablade und i dae khao san go shoppe. konsequenz: mir haend kei geld meh gha und s erscht mal muesse uselah... natuerlich haemmer no paar dollar fuer s visum vo doha bhalte und au no paar schwiizer franke, aber baht simmer voellig pleite gsi... darum haet petra es bikini au no fuer 200 und paar zerquetschti statt 350 uebercho. zum eis go zieh haemmer ebe zersch muesse geld uselah, was ja voll easy isch, will all 2 m en cashautomat staht. nacheme stuendli live musig simmer denn zrugg is hotel- isch so spaht worde wie no nie die ferie, naemlich fasch 2 ;-)

huet goemmer etz ebe an underground market und wahrschindlich mal no ines shopping centre- eifach zum luege. evt. goemmer au no inen park- wie petra seit *eifach echli umestriele*.

ob mer in doha is internet goend isch no fraglich. ziel waers doet, dass mer en mehrtaegige trip choented mache zum ganz qatar aluege, aber ob mer das choend, wuessemer nonig... aber am sunntig simmer ja scho widaer dihei :-(

übrigens da no es extra-bild für d'eva ;-)

specials about our trip...

1. u vill fraue und jungi meitli, sowie chind, haend im alltag es pyjama aa- wieso? wuessemer au noed, aber mir choented ja mal oepper fraege... es git eifach mega vill vo dene adae maert z chaufe...
2. maybe heisst bi dene vo de tempelalage yes und beduetet, dass mae bim zrugglaufe oeppis chauft. wenn mae aber seit, mae well etz eifach nur no de drink gnuesse, wo mae bi ihne kauft haet und mae well nuet meh chaufe, denn loends eim zack in rueh.
3. vietnamese sind weniger fruendlich zu tourischte als kambodschaner.
4. agebot vom hotel chamae prinzipiell ehner traue als irgendwelchne anderne- au wenn die evt. bitzli tuerer sind uf de erscht blick.
5. tipps vo irinne zum aesse chamae noed 100% ernscht naeh.
6. mae haet fuer alles chli laenger, als mae gseit ueberchunnt und es fangt au nuet puenktlich a...
7. fraue, packed eui sport-bhs ii
8. doha isch kein zwueschestopp wert, wo laenger als es paar stund oder maximum e nacht isch.
9. never trust anyone but yourself
10. mae wird eifach immer verarscht (s. 9.)

siem reap- letschte tag in kambodscha

huet haemmer namal uspennt und sind denn- nacheme usgiebige kambodschanische zmorge widaer ab is dorf. wills so heiss gsi isch, simmer grad nach em neue maert (womer oeppe e stund gsi sind und fasch 4 paar schueh kauft hetted und am schluss denn doch keis paar...) eis go zieh. es isch so heiss gsi und so drueckend, da haemmer noed andersch choene. aso simmer ines reschti idae pub alley. doet haemmer zwei cans fuer eini trunke (klar, ei can haet defuer 1.50 koschted, es getraenk i eusem hotel 50 cents...). denn simmer richtig old market zum go luege, wie wiit eusi hose sind. fertig- fasch... sie haend nur de gummizug gmacht gha und no kei schnuer durezoge. aber immerhin. mir haend denn grad schnell probiert, petra haets denn no chli inaeh lah (sind aber au etz no z gross...) will mer denn nachere halb stund namal verbi sind und die hose immer nonig fertig gsi sind, han ich gseit, ich well mini au no chli inaeh lah und mir chaemed defuer ersch oeppe inere stund widaer.

idae zwuescheziit hani muesse i euses reschti idae pub alley zrugg go min sack mit de iichaeuf hole, woni doet liegelah han. ha ja noed demit grechnet, dass dae no doet isch, aber isch so gsi...

euse obligatorisch shake simmer denn widaer im blue pumpkin go hole. vanilla ice cream yoghurt redberry shake- oder so aehnlich. hammerfein gsi widaer und euse lieblingschellner haet eus ganz lieb adie gseit ;-)

endlich haemmer eusi hose choene mitnaeh und sind uf em heiweg namal am water festival verbi. uu huere vill luet.



so a la zuerifaescht oder so... a beidne ufer jenes luet, jenes abfall und eigentlich isch nuet gloffe... paar waege, wo ihri sache verchauft haend und that s it... aber de luet gfallts offesichtlich- das isch ja d hauptsach!

im guesthouse zrugg haemmer eusi woesch in empfang gnoh (wo noed sonderlich suuber worde isch, aber sie waesched ja au vo hand da...) und eusi rechnig mal zahlt. mir haend recht zuegschlage gha, haet 135 dollar gmacht fuer die 6 uebernachtige inklusiv allem aesse und getraenk und tuc tucs zu de tempel und em bus nach bangkok morn. aber wenn mer das uf die 6 taeg usrechned, denn simmer widaer fasch bi eusne 20 dollar pro tag fuer alles- aber da mit einiges a luxus...

denn haemmer euses letschte tuc tuc in kambodscha gnoh fuer as konzert vom beatocello. en riese verchehrsstau haet eus denn dezue bewegt, z fuess wiiter z gah, so haemmers grad no gschafft. de beatocello haet es paar stuck zum beschte gaeh, chli werbig gmacht fuer sini spitaeler und eus bete doch bluet oder geld z spende. *young visitors please donate blood, old visitors (and in cambodia you are old when you are 50) please donate cash and those in between please donate both*. er haet vo de ursache vom schlechte gsundheitssystem gredt und vo massnahme, wie mae das widaer chan verbessere. isch aso e gueti verastaltig gsi und haet ja alles logisch toent...

nachdem mer en abstecher zum water festival gmacht haend und doet widaer noed wuerklich oeppis gloffe isch, simmer etz widaer back i eusem guesthouse und naemed euse letscht fruchtsalat in kambodscha. vilicht luegemer no en film. morn haemmer ueber 10 stund busfahrt vor eus... vo da nach bangkok...

siem reap- water festival und umehaenge

nachdem mer huet widaer mal chli uspennt haend bis oeppe am 11i, haemmer en richtige kambodschanische zmorge gnoh. petra chicken curry und ich fried noodles with vegetables. dezue euse obligatorisch fruchtsalat fuer 1 dollar (en rieseteller voll, wie immer).

daenn simmer lang is internet go luege, ob mer infos zu doha finded. und surprise! mir haend es paar infos gfunde. und sind etz zum schluss cho, dasses perfekt waer, wenn mir *4 days around qatar* choented bueche. und zwar vom mittwuch mittag (wo mir achoemed) bis am samschtignamittag (mir flueged znacht am 2). uf dem trip wueremer alles, alles gseh und- wie plant und gwuenscht- au idae wueschti uebernachte. s problem isch evt. nur, dass de trip wahrschindlich vor em mittag starte wird, aber das simmer etz am usefinde...

nach em mittag simmer denn los is town centre go luege, wie wiit eusi schniideri mit eusne hose isch. natuerlich haet sie sich namal vergroelet ab eusne taesche, womer idae hose haend welle und natuerlich isch sie nonig fertig gsi. aber das isch egal gsi, mir haend gseit, mir chaemed am 5i namal.

nacher simmer go luege, was am water festival so lauft. mir sind eigentlich genau rechtziitig doet gsi, will mir haend grad parade vo allne dracheboot gseh durefahre (so showmaessig halt). denn haend sich die alli oeppe 100m une a eus versammlet, alli paddel id hoechi und denn haends irgendoeppis gsunge und gschnurret. Logischerwiis haemmer nuet verstande. das ganze isch recht lang gange. denn sind alli widaer ufepaddlet (mir naemed mal a, es isch ufe gsi, will de fluss fluesst eigentlich gar noed...) und oeppe e halb stund spaeter sinds abecho. die einte schneller, die andere langsamer.

wo s eus denn langwiilig worde isch, simmer eis go zieh i *eusere* lounge, em blue pumpkin. die mached die beschte fruit shakes ueberhaupt. han huet min 3. mango shake gha doet ine... petra irgendsonen vanilla red berry superfeine ice cream shake. leider haemmer doet denn am halbi 5i use muesse... will nonig 6i gsi isch (de zweit termin, wo eus eusi schniideri gaeh gha haet) simmer halt namal eis go zieh im warehouse. doet isch denn nachere rundi yatzi 6i worde und mir sind namal an maert. leider nonig fertig, aber morn... sie gsehnd aber scho mal noed schlecht us. natuerlich haet sie widaer muesse groele, mir wuessed immer nonig so recht warum...

nachdem mer denn euses khmer-znacht gha haend (green curry, petra mit chicken, ich natuerlich mit vegetables) simmer am water festival nah heigloffe. es riese huere puff haend die 1000ae vo zueschauer (ja, isch noed uebertriebe, die ufer sind vollpackt gsi mit mensche!) hinderlah. aber es sind scho putzequipene underwaex gsi...

etz haemmer mal eusi woesch abgaeh zum waesche- letscht mal haemmers ja selber gmacht, aber wenn mer alles fuer 1 dollar pro kilo chan abgaeh, denn isch ja s woeschmittel fasch tuerer ;-)

morn versuechemer namal de tag easy durez bringe, will mer ja am aabig as konzert vom beatocello goend. sicher goemmer namal as water festival und denn namal an maert.

siem reap- 3. tag in angkor

sorry fuer die, wo versuecht haend en comment z schriibe und das ohni google-konto noed gschafft haend... han us verseh die istellig drin gha, dass nur registrierti user choend kommentiere...

huet haemmer am halbi 5i tagwach gha und sind zum angkor wat go de sunneufgang aluege. d.h. wenns denn en richtige gaeh hett... leider isch liecht bewoelkt gsi und dur das isch eifach langsam hell worde und gar noed so en richtige sunneufgang sichtbar gsi...

angkor thom bi bedecktem sunneufgang

janu, defuer haemmer no paar stund frischi temperature gha, so dass mer uf de phnom bakheng ufe sind go luege (gaht immerhin de hoger duruuf, de tod am tag dure).

teilwiis sind d stägetritt scho extrem steil...

denn haemmer zum abschluss no de angkor thom gmacht mit baphoun und elephant's terrace. und nach 3 taeg haemmers etz eigentlich gseh, die tempel. sie sind ja immer no faszinierend, aber irgendwaenn haet mae eifach gnueg.

underwäx hät petra denn au mal no welle en frosch probiere. seg chli troche...

mir sind aso richtig stadt gloffe (oeppe 6 km vor eus) und haend eus gseit, mir saeged eifach jedem tuc tuc fahrer, mir zahled 1 dollar fuer zrugg id stadt und wenn eus eine mitnimmt, denn ok, wenn noed, laufemer... die meischte haend eus noed welle mitnaeh, wills halt eifach zwenig gsi isch, aber eine haet eus denn ufglade, will er einewaeg zrugg id stadt isch.

vor em märt hämmer no das chline chätzli atroffe...

uf em maert haemmer namal usschau nach liechte lange hose ghalte, wo sowohl eusi groessi als au eusi laengi haend, aber da haemmer leider noed wuerklich e chance gha... d laengi isch eifach unmoeglich. mir sind denn bi sonere schniideri verbicho, won ich am erschte tag scho mal oeppis kauft han und denn haemmer die gfraeget, wievill dasses wuerd choschte, es paar hose mache z lah. 5 dollar haet sie gmeint- ohni stoff. ok, petra haet bi ihre de stoff kauft, ich bin uf d suechi amene andere stand und denn haemmer eusi hose in uftrag gaeh. mit saeck vorne und hine isches denn letschtendlich uf 6 dollar cho... de stoff no 6 fuer petra und 8 fuer mich (wobi ich denn no vorigs wird ha) wieso mir unbedingt langi liechti hose waend? tja, mir haend ja no doha vor eus und die einzige lange hose, womer susch no haend, sind jeans- was eus evt. chli z heiss isch... janu, etz haemmer hose fuer 12 bzw 14 dollar kauft- was sicher ehner vill isch, aber defuer haemmer eusi hose.

nach em maert simmer namal ine massage, das mal rugge-nacke-massage. aber es isch irgendwie e full body massage worde, recht schmerzhaft... mini masseurin isch vo thailand gsi, ich weiss noed, ob etz das e thai-massage gsi isch oder noed- hulmi?

uf das abe haemmer eus es tuc tuc hei gleischtet und etz muemer mal no oeppis aesse und denn luegemer wahrschindlich no en film- wenn moeglich eine, wo in angkor dreht worde isch...

ah, uebrigens morn isch da water festival und das heisst so vill wie drachebootrenne. huet sinds scho fliissig am trainiere gsi fuer d renne morn und uebermorn.

paddler bim üebe... die hindere stönd da, die vordere sitzed, nöd ganz glich wie bi eus ;-)

eini vo de teilnehmende gruppene hät grad vor ihrem dracheboot posiert. debi hettemer "nur" welle es föteli mache vom dracheboot-chopf mit em bluemeschmuck und de cherzli...

sie posiered au gern, wenns grad underwäx hei sind

d boot sind- noed wie bi eus- ganz simpel us holz gmacht, baenk irgendwelchi abfallbretter und paddel sind oeppe halb so breit.

mal luege, wie das morn wird, wenn die offizielle renne started, ihr werded devo laese und bald bilder gseh...

siem reap- 2. tag in angkor

geschter haemmer no city of ghosts glueget, eine vo villne film, wo in angkor dreit worde isch. usserddem natuerlich tomb raider oder rider mit de angelina.

huet haemmer eus vom hotel es tuc tuc gmietet und sind inen entlegenere tempel go luege. naemlich nach banteay srei. dae isch au wuerklich die reis wert gsi. sehr guet erhalte- natuerlich in zaemearbet mit de schwiiz ;-)

eini vo de viele tempelaalage in angkor...

underwäx zwüsched de tempel...

eifach genial, wie d natur teilwiis ihres gebiet zruggforderet!

mineopfer mached musig- für ihre stolz statt bettle

uf em rückweg vo banteay srei simmer no is berüehmte minemuseum vomene ehemalige mineleger und jetzige mineentschärfer go luege.

uf em rueckweg simmer angkor wat go besichtige und denn hettemer eigentlich welle de sunset bim phnom bakheng luege, aber leider haets am namittag immer meh zuetue, so dasses gar kein sunset gaeh hett... aso hämmer angkor thom agluegt, will ich gmeint gha han, bim sunneufgang tüeg mä de angkor vat aluege... hani mi tosche... wär aso de angkor thom, wo mä bi sunneufgang aluegt...

es paar verchleidete teenies für fotitermin uf em angkor thom (choschtepflichtig ;-))

angkor thom

aso simmer fruener zrugg richtig siem reap, haend doet schwiizer geld i dollar gwechslet und sind ab id city. zersch haemmer eus en einstuendigi fuessmassage fuer 4 dollar (plus 1 dollar trinkgeld) gleischtet. nebed de fuess haemmer irgendwie grad no en allgemeini entspannigsmassage gha- oberschenkel und rugge, nacke, chopf... haet uf jede fall super tue!

i dem moment isches no e fuessmassage gsi... läck händ mir dreckigi füess gha- die arme masseure...

go aesse simmer denn id world lounge- cambodian curry widaer mal. isch fein gsi, aber die strassebeize schlahts halt noed so... mae merkt, dasses da no meh uf touris usgrichtet isch als susch neumetz. aber egal, irgendwie gnuessemer au die vorteil, wo e touristischi stadt so mitbringed, naemlich die ander iistellig zu arbet. da schaffed irgendwie alli chli, mir gsehnd selte oepper bettle. egal was, sie mached alli oeppis. zueg verchaufe um de tempel ume, butze idae tempelalage und uf de weg doet ane, idae kuenschtliche seeae oder halt tuc tuc fahre oder imene reschti oder guesthouse schaffe. irgendoeppis gits immer z tue, au wenn die luet da s laebe scho no chli easier naemed als mir. d haengematte chamae immer mal amene baum oder so ufhaenke und schnelligkeit haends au noed erfunde. aber mir verstoend das, bi dere hitz isch au irgendwie alles vill schwerer...

nach em znacht simmer im temple restaurant go apsara tanz luege. traditionelle kambodschanische tanz, wo d taenzer so ihri haend extrem nach hine bueged. sehr aesthetisch gseht das us, v.a. sinds ja au wuerklich schoeni fraue. aso sehr schoen.

im buech "first they killed my father" hani gläse, dass während de khmer rouge i dä arbetscamps vo de chind tanzgruppene gäh hät, wo d ufseherinne de meitli stundelang d händ hinderebunde händ, damit sie die schön bügig überchömed...

flirte uf kambodschanisch (die mached das nöd so öffentlich suscht...)

denn haemmer es tuc tuc gnoh und sind widaer i euses yellow guesthouse zrugg. morn haemmer ja grosses vor- angkor wat bi sunneufgang- wenn mer denn d sunne gsehnd... susch haemmers halt verpasst, was au noed schlimm waer, will die tempel bi sunneuf- und untergang eh voellig gspunne ueberfuellt sind. morn haemmer no die ganz alag vo angkor thom vor eus- nach em sunneufgang. das machemer etz mal alles z fuess, denn haemmer fasch alli moegliche transportmittel fuer die tempel au gnutzt- usserd minibus und gfuehrti tour mit car.

das isch übrigens euse täglich (mind. 1 mal pro tag) fruchtsalat gsi im guesthouse. übervoll für en dollar...