sevilla vom 19.-22. märz

hiiflug uf standby: zum erschte mal bini standby gfloge. am mäntig häts no 3 plätz uf em flüüger gha, am ziischtigaabig dänn scho widär 10. aso simmer locker vo züri uf palma mitcho. vo palma uf sevilla häts denn schwieriger usgseh... nach langer warteziit hämmer jump seats übercho, will de air berlin pilot gmeint hät "was, zwei von der belair sind noch da? die müssen mit, die sind ja familie!" de sauté häts sich idä kabine bequem gmacht und ich... im cockpit- hammermässig!

mit ere stund verspätig simmer denn in sevilla acho, scho erwartet vom näd. bim näd dihei hämmer zersch e churzi siesta gmacht, bevor mer id stadt go znacht ässe sind.
























tapas im cafe imperial (oder so). mega fein! und nacher no eis go zieh im el laberinto- a la ziegel in züri.

wills am dunnschtig voll gschiffet hät, simmer ersch mega spaht use. händ chli en spaziergang gmacht idä gässli vo sevilla und gäg di 8i simmer vor de catedral gsi zum eini vo de prozessione vo de semana santa luege.



















nachdem's de jesus us de catedral usetreit händ, simmer denn uf em weg zu de carbonara no ine tapas bar go euse znacht ässe. idä carbonara hämmer eus so installiert, dass mer uf d'mini-bühne gseh händ. döt händ 4 und nacher 6 lüüt es programm uf bei gstellt. ei frau hät tanzt zu gitarre, flöte und gsang. sevillanas... will mer am nächschte tag chli touristeprogramm händ welle mache, simmer denn nacher hei.























































am karfriitig gaht alles chli früener zue, darum hämmer vor em mittag welle us em huus.



















hämmer leider nöd gschafft, es isch aso fasch 2 worde, bis mer vor em real alcazar gsi sind.

dä hät nur bis am 2 offe gha, darum hämmer nüme inechöne.



















(links d'muure vom real alcazar)
aso simmer halt id catedral ine und döt uf de turm ufe. hammerussicht über ganz sevilla! über s'flussufer simmer denn hei- eigentlich hettemer am ufer welle ässe, aber s'hät so vill lüüt gha, dass mer dänn nur en snack imene imbiss gnoh händ.



















nachere siesta bim näd dihei simmer denn id almadena (glaubs) go znacht ässe und eis zieh. denn au no inen club, wo nöd schlecht gsi wär, aber döt simmer denn nöd lang blibe...

am samschtig simmer vo sevilla nach malaga mit em zug und händ döt euse zmittag imene chiringuito am strand gässe. de heiflug isch denn liecht verspätet in basel acho, was zur folg gha hät, dass mir vo züri nüme an flughafe cho sind. miteme umweg über bülach und eme abstecher is quo vadis, simmer denn in rüti acho...

de nächscht bsuech wird cho! sevilla tiene un color especial...